Psa 35 | HUI | STEP | Anduane Homogo-o agali i̱la manga halu hoba migimigi bu karu í̠na tihondo manga halu hoba mu habe. I̱naga waitigi bu karu baba í̠na nde ti baba wai bialu habe.

a 35.4Iba 40.14, 70.2, 129.5

b 35.12Iba 38.20, Yar 18.20, Yo 10.32

c 35.13Yob 30.25, Md 10.13, Lg 10.6

d 35.19Iba 69.5, Yo 15.25

e 35.24Iba 26.1, 43.1

f 35.28Iba 51.14, 71.15, 71.24

Psalms 35

Anduane Homogohondo biamogo bia lalu bi lenego ogo

1 Anduane Homogo-o agali i̱la manga halu hoba migimigi bu karu
í̠na tihondo manga halu hoba mu habe.
I̱naga waitigi bu karu baba
í̠na nde ti baba wai bialu habe.
2 Í̠na wai biagane ale ngeru mo karulalu humbi mo yalu
i̱ biamogo bule ibabe.
3 I̱ bo wahole talima ibiraru hondowa
í̠na ayu yandarebi mo yalu
i̱ pele ngule abale ibabe.
Í̠na i̱hondo lalu,
Í̠ biamogo biaga i̱ kogoni, labe.

4 Agali uruni tigua i̱ bo wahole kagola ^a
í̠na ti bope halu mo taga habe.
Tigua i̱ bo waholenaga wai hanalu kago
í̠na agali uruni talima pialu mo luluya habe.
5 Anduane Homogo-o
í̠naga dahuliyalime agali ko uruni bo talia togolalu
puyabume datani pulo waharadagua bilabe.
6 Í̠naga dahuliyalime ti bama talima pialu kagola
agali ko biagarunaga hariga poragoria
aruma helalu mo ko habelo hameledo.

7 I̱na ti mo ko naheore hewaria
tigua i̱ gonoha delo gono wia do ho kagoni.
I̱ pilo ngelo gundu uli tombo wiaho ka.
8 Tigua ani bu kagoyu tini nahende kaore
mo ko holene abale íbu ngelabe.
Gono i̱ delo wiyadagoha tini da aribia helabe.
I̱ uli pelo gundu uli tombo wiyadagoha
tini uli pelo hameledo.

9 Anduane Homogo í̠na anidagua beregola
i̱ turu timbuni ho holebero.
Í̠na i̱ pele ngeregola
i̱naga bu miniha dungulo holebero.
10 I̱na Anduane Homogohondo ka̱i̱ lalu,
Anduane Homogo-o í̠ ale mende ai kabe.
Í̠na wali agali yagibano karu biamogo bialu
agali hongohe karunaga giha howa biamogo bialu mo wirili.
Agali homogo hongohe karume yagibano karu mo ko holilono
í̠na pele mialu mamage ho harili.

11 Agali ke̱ haga bu karume i̱hondo bi laede halu
i̱na mana ko nabinigo tigua i̱na ko biya laga ka.
12 I̱na tihondo mana bayale bialu kogola ^b
tigua i̱hondo ko biadai biaga ka.
Anidagua bialu haragome
i̱naga bu miniha genda ho kogoni.
13 Ti warago timbuni bo ngangi i̱na ti dara halu ^c
i̱ni mo dindiha howa dara holene aga karulalu tomo nane haruli.
Tomo nane howa i̱na Anduane Homogohondo tinaga bi la halu harugoni.
14 I̱na i̱ni aba hamene haniniru baba miniha gendaho hagadagua
ti dara halu gendaho ibaga bialu harugoni.
I̱ agali darabi ai̱ya homene igini haradagua buwa
dugu bialu i̱naga bu miniha genda yu harugoni.

15 I̱ genda yu hewangi
ti mo mogo buwa i̱ hondo oba halu turu haga biya.
Tigua i̱ mo ko holenaga mo ngoai ho hayagoni.
Agali maru i̱ de nahendene hearume
i̱ mo ko holenaga bi ko lalu i̱ baabo haya.
16 Tigua i̱ mege biaabo halu haya.
Tigua i̱ handabe manga halu
ngui higi bu yu ibagabu hayagoni.

17 Anduane Homogo-o tigua agira halu ogonidagua bialu haabo helo heloleberebe.
Tigua i̱ mo ko nahelo tinaga giha howa
í̠na i̱ pele ngibe.
Ti laiono gabua ale howa i̱ bo wahole kago
tinaga giha kongi í̠na i̱ mo wibe.
18 Í̠na i̱ biamogo birigonaga
i̱na wali agali dewa ngoaiho karia howa
ti hale helo í̠hondo ka̱i̱ lolebero.
Wali agali dewaliore bu karunaga deni howa
í̠naga mini yaraga halu holebero.

19 Agali maru i̱la waitigi bame irane nawini ho karume ^d
i̱ mege bialu bope helo nahelabe.
Tigua i̱ bameore handabe manga ho karume
i̱ hondo oba halu mini ko wialu mine helo nahelabe.

20 Agali uruni tigua mendeali karu baba
bayale holenenaga bi nalaga ka.
Tigua wali agali bayale karu baba karia
ko mbira nabini kago mo yapara howa
bo wahole bi lalu haga ka.
21 Tigua i̱hondo bi hongo howa ladagadaga bialu lalu,
Heneneore í̠na ko birigo ina handarima, lalu haga ka.
22 Anduane Homogo-o tigua ani biyaruni í̠ de handarigo
í̠na bi nale nahabe.
Anduane Homogo í̠na i̱ helalu kaundiaha nahabe laro.
23 Anduane Homogo-o í̠ore abale heyalu
i̱ biamogo bule ibabe.
I̱naga Ngode Datagaliwabe-o í̠ heyalu
i̱na bi lalu koru mo hongo halu lahabe.
24 Anduane Homogo-o í̠ mini tigabiore kego ^e
í̠na i̱ mana mbira ko nabini kogo latagi habe.
Waitigi karume manda bilo
i̱ biamogo bialu i̱naga bi lahabe.
Agali uruni tigua i̱ hondo oba halu
bi ko lalu mine helo nahelabe laro.
25 Tigua tini lo mitangi bialu lalu,
Mbirale bilo hamelo harimago ai tagira piyagoni.
Agali o biago iname mo ko ho waharimagoni, nalelo
í̠na i̱ handayaho habe laro.

26 I̱ha genda ibiyagonaga turuho haga karu
í̠na ti taga helo mo luluya ho helabe.
Tigua i̱ bope halu tininaga mini yaraga haga karu
í̠na ti bope halu mo taga ho helabe.

27 Í̠na i̱ agali tigabi ka labelo hamelo karu
tigua turu ho howa tinaga bu miniha dungulo helo helabe.
Horo bibahendengi tigua lalu,
Anduane Homogo ibu dunini heneneore mbira ka.
Ibugua ibunaga biabe biahaga kago bayale helo hame laabo haga ka, lolebira.
28 I̱na í̠ mana bayale bialu mini tigabi kego lalu ^f
horo bibahendengi howa latagi halu
í̠naga mini yaraga halu haabo holebero.